Mar 4 | DOB | STEP | Muliyega wate Yesu 'iila limana Galili le'awinaya sabi loguguya ta boda sinabwana siegogona 'enaya, 'enega 'ebweu waga 'idoedoe 'enaya 'igelu ga 'imiyatowa, ta pwalu le'awaya sitootoolo.

Mark 4

Onasemalimali tolelewana manuna

(Madiu 13:1-9; Luke 8:4-8)

1 Muliyega wate Yesu 'iila limana Galili le'awinaya sabi loguguya ta boda sinabwana siegogona 'enaya, 'enega 'ebweu waga 'idoedoe 'enaya 'igelu ga 'imiyatowa, ta pwalu le'awaya sitootoolo. 2 Ta Yesu onasemalimali yauna 'ediyega 'ie'ita tomota 'ediya, 'igwaegwae, 3 “Wanono! Tobagula 'ebweu 'ina bagulaya 'itauya ga witi atuna 'ilelewanedi, 4 ga 'aina atu nidi 'edaya sibe'u, 'enega manuwa si'itedi ta simwa'uta ga si'enidi. 5 Ta 'aina sibe'u bwa'a logulegulewana 'enaya ga sitabwa manini, manuna bwa'a gidalina tuga, 6 'enega ala 'itudimwedi ga si'oapelu, manuna lamudi nigeya bwa'a gonituna silobaloba. 7 Ta 'aina kwakwakwala 'ediya sibe'u ga sitabwa enoenowa, ta nigeya kapekapeyana be siuuwa, manuna kwakwakwala 'iewaiwai ga 'ididiemwawasidi. 8 Ta 'aina atu bwa'a bobo'ana 'enaya sibe'u ga sitabwa ta sisinabwa ga siuwa, ga 'aina teti, be sikisiti, be analedi.” 9 Ga Yesu 'ieonedi, 'igwae, “'Eguma matenami ona gete wada nono.”

Onasemalimali 'ina apwesas 'alena

10 Muliyega pwalu sidelisawala ga Yesu taunamo, ga 'aina tomota ta 'ina tononoyao site tuwelo ma'ediyao simai ga Yesu 'ena sienaida, sigwae, “'Imu onasemalimali nidi to'ase 'adi mwalatoi?”

11 Ta Yesu 'igwae, “'Omi ni'atu Yaubada 'emiya 'i'ebwaya be 'ina loina sola'ai'ailidi 'ana tomwalatoiyao, ta esi tomota yaudi nuwa potapotadi ga onasemalimali sinono, 12 ta 'ana nuwasabwalena nigeya simwalamwalatoni, ta wate 'ana mwalatoi si'ebe'ebese ta nigeya sawesawenaya siloba. 'Enega wate nigeya sawesawenaya 'idi loegesiyao 'ediyega sinuwanuwa'ebuni, be geya'abo Yaubada 'inuwanuwataudi.”

Onasemalimali tolelewana manuna 'ana li'ama

(Madiu 13:18-23; Luke 8:11-15)

13 'Enega Yesu 'ieonedi, 'igwae, “Mwa'adega 'igu onasemalimali gete nigeya wanuwanuwa sabwaleni, aga? Be mwa'adega 'aina onasemalimali gete nadigega wada nuwasabwalenidi?

14 “Tobagula nina Yaubada 'ina ona 'ilelewanena. 15 'Aidi atu sibe'u 'edaya, 'atuwa nadigega tomotai Yaubada 'ina ona sinonona, ta 'enega Seitani 'imai ga ona nina 'ediyega 'i'ewa yauledi.

16 “Wate nadigega atu nidi bwa'a logulegulewana 'enaya sibe'ube'u, 'aene 'abo tomota nidi Yaubada 'ina ona sinonoi ta ma idi gwausowala sitatagwala, 17 ta nigeya lamudi 'ipa'apa'ala, 'enega tuta gidalina namo 'enaya sida miyami, be 'abo to tuta 'enaya Yaubada 'ina ona 'ana emisa manuna mwau nai etalauwala silobai, sibe'u manini.

18 “Ta atu nidi kwakwakwala 'ediya sibe'uya 'atuwa tomota nidi taudi Yaubada 'ina ona sinonona, 19 ta esaesa be bale'u 'ina yageyao 'adi nuwanuwa 'ediyega Yaubada 'ina ona sinuwa pupulena, 'enega nigeya sawesawenaya be siuuwa.

20 “Ta atu nidi bwa'a bobo'ana 'ena sibe'uya 'atuwa tomota nidi taudi ma idi 'atetagwala Yaubada 'ina ona sinonona, 'enega uwadi bobo'ana ta yauna siuwaedi. 'Aina uwadiyao teti, ta 'aina sikisiti, ta 'aina analedi.”

Onasemalimali mayale manuna

(Luke 8:16-18)

21 Ta Yesu wate 'ediya 'igwae, “Geya'abo mayale loeloe'abina tasa'usa'u kwaiye 'ule nai sita 'ediyega, ta esi 'atamanaya tasa'u be 'imaedana, 22 be 'enega yage nidi kwaikwaiyidi ma'etamo maedana nina 'igieapwesedi be ta'itadi. 23 'Eguma matenami ona gete wada nono.”

24 Ta wate 'ieonedi, “Wada nuwa'i'isi be ona wada nono 'ai'ailidi, manuna 'eguma 'omi to'ase wa'ebwaya, wate nadigega 'ana e'isa wa'ewa, ta esi ma 'ana loeposeyana. 25 Manuna 'eguma yaita 'enaya Yaubada 'ina gwegwe 'imiyami, gwegwe nina 'iloeposeyane. Ta yaita 'enaya nigeya Yaubada 'ina gwegwe 'imiyami, to'ase 'ena 'imiyami Yaubada 'enega 'i'ewa yauledi.”

Onasemalimali suwana manuna

26 Ga Yesu 'igwae, “Yaubada 'ina loina tomota 'ediya 'atuwa nadigega suwana tai 'ina tanowaya 'iasodi, 27 ta tai nina 'i'eno be 'itoolo 'asiyata be boiboiya, ta suwana nidi sitabwatabwa, ta nigeya 'imwalamwalatoni mwa'adega sitabwatabwa'esa. 28 Manuna bwa'a 'iloina 'idi tabwa be 'idi sinabwa be 'idi uwa manuna, 29 be muliyega 'abo uwana 'imatuwa 'enega toni bagula nina 'ie'ale be 'isesoni.”

Onasemalimali beno atuna manuna

30 Yesu wate 'ieonedi, 'igwae, “Mwa'adega Yaubada 'ina loina onasemalimaliyega yada giemaedana'ese 'emiya? 31 Nai gete nadigega 'ebweu kaiwe atuna 'enaya yada loesawa'i'i, nate beno, manuna beno atuna gidalina, 32 ta 'abo taasoi be 'itatabwa pwatula 'isinabwa sinedi, ta nalinao sinabwadi 'isa'udi, be nalinao yauyaukwidi 'ediya manuwa 'idi newa si'abidi.”

Yesu 'ina onasemalimali yauna

(Madiu 13:34-35)

33 Yesu 'ina loguguyao 'ediya tuta yauna onasemalimali yauna 'ediyega 'ie'ie'ita, be 'enega 'abo tomota 'ediya kapekapeyana sida mwalatoni. 34 Tauna tuta yauna onasemalimaliyega 'iloguloguguya pwalu 'ediya, ta 'ina tononoyao dimo 'ediya onasemalimali nidi 'ili'ali'amidi.

Yesu yagila be lisu 'iloinedi

(Madiu 8:23-27; Luke 8:22-25)

35 'Asuinuwanuwaya Yesu 'ina loguguya wagega 'ilosalonina ga 'ina tononoyao 'ieonedi, 'igwae, “Wageluma be taabala mali esenaya.”

36 'Enega sigelu ga sigiseyana ga pwalu le'awaya sipilisinedi, ta 'aidi waga wate ma'enao, 37 ga wediliya sinabwana 'itowama, ta lisu wagaya 'isiwasiwa'oya'a ga 'iabe sidadamana. 38 Ta Yesu waga kuliginaya 'ana gedu 'isa'una ga 'i'eno mwataya, ta 'ina tononoyao silowanowanona ga sigwae, “'Inapwana 'utoolo be 'ulemeda. 'Iabe tamwamwawasa!”

39 'Enega Yesu 'itoolo ga yagila be lisu 'iba'edi, 'igwae, “Tuwa! 'U'emutuyo be 'usiwalowa!” 'Enega yagila 'ipela ga bwagabwaga maibo'ana 'isiwalowa. 40 Ta 'ina tononoyao 'ediya 'igwae, “To'ase manuna wamatauta? Mwa'adega nigeya waemiemisegu?”

41 Ta nuwadi 'iowana ga simatauta, ta taudimo 'ediya sigwae, “To tai sana gete ga yagila be lisu 'enana siematamatanena?”